Bak saboh malam, lheuh jitoh ujeun ngon got teuga, na sigoe sa'p si Liyah di chat lam grup WhatsApp; nan grup WhatsApp nakeuh "Cucoe Solutan". Anggota dalam grup nyan terdiri dari Toke Doki seubagoe adeumin, lheuh nyan nyang laen mandum anggota teumasok bang Matsyah, Liyah, Li Timsut, Ibeunu, Nyakmat ngon ulon tuan.
"Malam yoe ta jip kupi bak meja biasa beh, na inpo mangat yoe" tuleh si Liyah ngon bahasa Aceh yang reuloh hana ta teuoh peu-meuphom. Hai makeusud dineuk tuleh, "malam nyoe, tajep kupi bak meja biasa beh. Na info mangat nyoe". Teuma kakeuh, kuban tapeugot, seubab si Liyah hanjeut takheun sapeu, peulom ta peurunoe lam bab teumuleh, langsong jie-ek seupaning jih, seubab jih ka jiklem droe jih seunagoe jurunaleh (jurnalis) hayeu di kuta kamoe.
"Pue katuleh nyan, Liyah?" Na siat geubalah le bang Matsyah.
"Mumang bak ta peuphom, lun memang," tamah si Ibeunu.
"Ikah ka meupue ajue meunyoe keugop," bela si Nyakmat.
Si Nyakmat, cara seumike jih rab saban ngon si Liyah. Dua awak nyan rab saban peurangui. Saban-saban galak keu informan. Nyakmat kadang-kadang sok-sok lage wareutawan cit wate jie teumanyong, leubeh nibak si Liyah wareutawan. Meusabab nyankeuh ijih sabe didong blah si Liyah.
Ilon, Toke Doki ngon Li Timsut kubaca saga cagok awak nyan lam grup. Langsong kupeu udep honda kubeurangkat u kuta, bak warong kupi biasa. Lheung kira-kira limong blah minet langsong meutipek u tumpat. Trok keudeh, Toke Doki ngon si Li Timsut ka teuduk bak meja biasa, na siat trok si Liyah meuikot-ikot ngon si Ibeunue dan si Nyakmat. Pakat that lhe jih, hana kuteupue sagai.
"Gadoh neupakat duk bak keude sot-sot," kheun si Ibeunu bak Toke Doki ngon Bang Matsyah.
"Peusit. Seungaja geuduk hinoe mangat jeut geurhah tanyoe," seuot si Li Timsut.
"Padahai bak tanyoe kop jai ka kaphe baroe," tamah si Liyah. Toke Doki ngon bang Matsyah mantong geuim hana geuseuot sapue. Ilon meunan sit, peutajak peusabe puk ngon peureute bucoe haloh nyan.
"Kaphe pue cafe, Liyah?" tanyong Toke Doki.
"Kaphe majusi peu kaphe naseurani, Liyah? Beu jeulah," sambong bang Matsyah. Si Liyah hana langsong di jaweub, hana waham jih ngon haba sareukas Toke Doki ngon Bang Matsyah. Bak sagoe binteh, si Ibeunu kadok jikhem, si Nyakmat meukeurue'op lheuh seubab kinong seunior jih.
"Makeusud bang Liyah, pakon hana tajep kupi bak keude laen sigoe-goe". Si Nyakmat dicoba peujeulah haba si Liyah Wareutawan. Heut nyan dipeubut mangat bek teu-inggik–inggik si Liyah lam keulawan kamoe.
Keadaan mulai seungap siat, hana meusidroe pih nyang meusyukek le. Lage tapeulon panyoet kiraju. Seungu lheuh. Lage lam teungoh uteun. Si Liyah hana le daya golom kick off babak pertama jih ka KO. Ilon ngon si Ibeunu kuhing ngon dok.
"Teuma Liyah peu na info kapakat jep kupi kamoe?" Lheuh seungap na padum trep, si Li Timsut jirhom pertanyaan baroe keu si Liyah Wareutawan.
"Nyang bek kaneuk ceurita teuntang diwan keureutah bulut keunoe bak kamoe. Saboh teuk, bab bimtek bek kajak surah cit. Hana kuteume deungoe kah le," tamah Toke Doki.
"Kadang jineuk peugah bab photo teulhon adek diwan. Di peugah le si Ibeunu bak jih na photo nyan," pansi bang Matsyah.
"Patot keuh meu–ie breuh si Liyah malam nyoe, rupajih na kinong mamam uang lendir," timpa Toke Doki. Si Liyah meutamah meube'p-be'p, hana jibantah sapue. Bak binteh keude, jarom jeum ka diputa bak angka poh 12 pah. Langet mantong reudok, keadaan leupi lheuh sampoe lam tuleung.
Bak sisi laen, awak keurija warong meusidroe tan trok ijak tanyong kamoe peu ie meujep. Aleh dipike kamoe hana peng cit. Aleh dipeubiyeu-biyeu meusabab dianggap kamoe nyoe seubagoe langganan. Alah hom hai. Pak ek tajak sudi sampoe teok keunan. Tapi kadang-kadang beurigen teuh cit keu peulayanan lage nyan.
"Beh ka," Toke Doki ka geumulai lom. Jinoe meunoe Liyah, makeusud kah kapakat kamoe jep kupi keupue? Peuna hai nyang meunarek ta bahas? Meunyoe hana, bah kubahas le lon.
Kheun Toke Doki, dariapada tabahas masalah adek-adek diwan lale ngon pilem si Unyil, leubeh got ta bahas si Dolah mantong, ureung kaya baroe di Gampong Lumpoe. Ijih jinoe kajeut keu Toke Jakarta, tapi sinoe di gampong ijih dihoi ngon Teungku Tramadol, seubab calon rabaroe jih aneuk mantan teungku imum gampong jameun. Kon han mumgken meunyoe lakap teungku hana bak jih?
"Teuma di teungku nyan pakon geutung balu-balu lage nyan keu meulinte geuh?" tanyong si Li Timsut.
"Ikah nyan pih ka tanyong. Donya ka lucot, peu hana ka teuoh, kon ka leubeh mulia toke tramadol ngon pimpinan dayah," jaweub bang Matsyah.
"Sayang teuh. Si dara aneuk teungku imum nyan meuthon-thon ijak beut di dayah. Ban meutume lakoe ka si Dolah meukat ubat reuneng," tamah si Ibeunu.
"Kadang ijak bot, kon ijak beut. Peu ta sayang, ka meunan keuheundak Poe," seuot si Nyakmat.
"Ikah sit cemburu keuh, seubab calon rabaro si Dolah mantan kah jameun," bantah si Ibeunu. Na siat, awak keurija warong teuka bak meja kupi komplotan Toke Doki. Baroe lah kamoe peusan ie sesuai deungon keadaan malam nyang leupi lheuh.
"Beh kasep, kon nyan nyang peurle taneuk bahas," seukak Toke Doki. Lheuh nyan meusidroe tan meukeutek le. Seungap lage ta peulon panyoet kiraju. Na siat katrok jiba kupi siap ngon teumon ie. Boh keupila reuboh, kacang, keurepet, timphan. Pokok jih ubena kueh bunoe beungoh nyang mantong tinggai lam rak abeh jibot keu kamoe.
Penulis; Adam Zainal, Novelis dan Jurnalis, tinggal di Bireuen.
إرسال تعليق